Հոկտեմբերի 1-ին ՀՀ դեսպան Աշոտ Հովակիմյանը Բելգրադում հանդիպումներ ունեցավ Սերբիայի Եվրոպական ինտեգրման նախարար Նեմանյա Ստարովիչի, Կրթության նախարար Դեյան Վուկ Ստանկովիչի և Արտաքին գործերի նախարարության պետական քարտուղար Նեվենա Յովանովիչի հետ

01 հոկտեմբերի, 2025

Հոկտեմբերի 1-ին, Սերբիա կատարած աշխատանքային այցի շրջանակներում, ՀՀ դեսպան Աշոտ Հովակիմյանը Բելգրադում հանդիպումներ ունեցավ Սերբիայի Եվրոպական ինտեգրման նախարար Նեմանյա Ստարովիչի, Կրթության նախարար Դեյան Վուկ Ստանկովիչի և Արտաքին գործերի նախարարության պետական քարտուղար Նեվենա Յովանովիչի հետ։

Դեսպան Հովակիմյանը զրուցակիցներին ներկայացրեց օգոստոսի 8-ին Վաշինգտոնում ձեռք բերված համաձայնությունները՝ առանձնահատուկ շեշտադրելով հաստատված խաղաղության նշանակությունը տարածաշրջանի կայուն զարգացման, հաղորդակցությունների ապաշրջափակման համատեքստում, ինչպես նաև «Խաղաղության խաչմերուկ» նախաձեռնության և դրա առանցքային բաղադրիչ հանդիսացող TRIPP ծրագրի իրականացմամբ տարածաշրջանում բացվող նոր հնարավորությունները։

Եվրոպական ինտեգրման նախարար Նեմանյա Ստարովիչի հետ հանդիպման ընթացքում կողմերը քննարկեցին Հայաստանի և Սերբիայի միջև համագործակցությունը ԵՄ հետ հարաբերությունների խորացման վերաբերյալ երկուստեք հետաքրքրություն ներկայացնող հարցերում: Դեսպան Հովակիմյանը ներկայացրեց «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքը, որն արտացոլում է Հայաստանի ժողովրդի եվրոպական ձգտումները, ինչպես նաև Հայաստան-ԵՄ իրավապայմանագրային հիմք հանդիսացող փաստաթղթում՝ Համապարփակ և ընդլայնված գործընկերության մասին համաձայնագրում ներառված ոլորտներում ԵՄ օրենսդրությանն ու չափանիշներին համապատասխանեցման ուղղությամբ տարվող աշխատանքները։

Կրթության նախարար Դեյան Վուկ Ստանկովիչի հետ հանդիպման ընթացքում կողմերը քննարկեցին կրթական ոլորտում Հայաստանի և Սերբիայի միջև համագործակցությունը և ընդլայնման հնարավորությունները, մասնավորապես, ուսանողների փոխանակմանը, ինչպես նաև Սերբիայում հայագիտության և հայոց լեզվի ուսումնասիրմանն ուղղված քայլերը։ Երկուստեք պատրաստակամություն հայտնվեց շարունակել և խորացնել համագործակցությունը։

ԱԳՆ պետական քարտուղար Նեվենա Յովանիվիչի հետ զրույցի ընթացքում կողմերը անդրադարձան Հայաստան–Սերբիա երկկողմ հարաբերությունների ներկա վիճակին և դրանց զարգացման հեռանկարներին՝ ընդգծելով քաղաքական երկխոսության խորացման ու տարբեր ոլորտներում համագործակցության ընդլայնման կարևորությունը։

Հանդիպումներին մասնակցում էր Պրահայում ՀՀ դեսպանության Բելգրադի գրասենյակի ղեկավար Հայկ Խեմչյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր