ՀՀ դեսպան Աշոտ Հովակիմյանը ներկա գտնվեց CLARA գերազանցության կենտրոնի բացման արարողությանը

13 նոյեմբերի, 2024

Նոյեմբերի 13-ին ՀՀ դեսպան Աշոտ Հովակիմյանը Պրահայի Տեխնիկական համալսարանում ներկա գտնվեց CLARA (Արհեստական բանականության և քվանտային հաշվարկի օգտագործմամբ ուղեղի համակարգային հետազոտության) գերազանցության կենտրոնի բացման արարողությանը: Կենտրոնի նպատակն է՝ առաջ մղել նեյրոդեգեներատիվ հիվանդությունների՝ մասնավորապես, Ալցհայմերի հիվանդության և դեմենսիայի, հետազոտության և բուժման սահմանները, մշակելով լայնածավալ բազմաչափ կենսաբանական և կլինիկական տվյալներ՝ արհեստական բանականության, հզոր գերհամակարգիչների և քվանտային մեթոդների օգտագործմամբ:

CLARA-ն համակարգվում է Պրահայում գտնվող INDRC (Նեյրոդեգեներատիվ խանգարումների հետազոտական միջազգային կենտրոնի) կողմից՝ Չեխիայի չորս գիտահետազոտական ինստիտուտների և Ֆրանսիայի և Գերմանիայի գիտական կենտրոնների համագործակցությամբ և Եվրոպական Միության ֆինանսավորմամբ:

Բացման արարողության հիմնական բանախոսն էր՝ CLARA-ի փորձագետների խորհրդի նախագահ և INDRC-ի գիտական խորհրդատվական խորհրդի նախագահ, դոկտոր Արա Ս.Խաչատուրյանը, քննարկումներին մասնակցում էր նաև խորհրդի անդամ դոկտոր Զավեն Խաչատուրյանը:

Կենտրոնի բացումից մեկ օր առաջ, նոյեմբերի 12-ին, ամերիկահայ հայտնի գիտնականներին, INDRC գործադիր տնօրեն Լենկա Ուլդրիյանովայի ուղեկցությամբ, ՀՀ դեսպանությունում հյուրընկալեց դեսպան Աշոտ Հովակիմյանը:

Քննարկվեցին INDRC-ի և Հայաստանի գիտական հաստատությունների միջև համագործակցության հաստատման հեռանկարները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր