Ապրիլի 18-19-ին ՀՀ դեսպան Աշոտ Հովակիմյանն աշխատանքային այցով գտնվում էր Սերբիայում

18 ապրիլի, 2024

Ապրիլի 18-19-ին ՀՀ դեսպան Աշոտ Հովակիմյանն աշխատանքային այցով գտնվում էր Սերբիայում:

ՀՀ դեսպանին ընդունեցին Սերբիայի Ազգային ժողովի փոխնախագահ և Արտաքին գործերի հանձնաժողովի նախագահ Մարինա Ռագուշը և Սերբիայի Արտաքին գործերի նախարարության՝ Երկկողմ հարաբերությունների հարցերով նախարարի գործող տեղակալ Տամարա Ռաստովաց Սիամաշվիլին:

Հանդիպումների ընթացքում ՀՀ դեսպանը տեղեկացրել է Հարավային Կովկասում առկա անվտանգային իրավիճակի և տարածաշրջանում խաղաղություն ու կայունություն հաստատելու ուղղությամբ Հայաստանի կողմից գործադրվող ջանքերի և մոտեցումների մասին, որոնք հիմնված են տարածքային ամբողջականության, սահմանների անքակտելիության, ինքնիշխանության սկզբունքների աներկբա հարգման վրա։ Քննարկվեցին Հայաստանի և Սերբիայի միջև քաղաքական երկխոսությունը ակտիվացնելու, բարձրաստիճան այցեր փոխանակելու, Եվրոպական Միության ծրագրերի շրջանակներում համագործակցելու հնարավորությունները: Սերբիայի Խորհրդարանում հանդիպման ընթացքում երկուստեք արձանագրվեց միջխորհրդարանական հարաբերությունների աշխուժացման անհրաժեշտությունը ինչպես երկկողմ, այդպես էլ միջազգային խորհրդարանական հարթակներում:

Ապրիլի 18-ին Սերբիայում Ֆրանսիայի դեսպան Պյեր Կոշարի նախաձեռնությամբ՝ ի պատիվ ՀՀ դեսպանի տրվեց աշխատանքային ճաշ Սերբիայում Եվրոպական Միության անդամ երկրների մի շարք դեսպանների մասնակցությամբ, որի ընթացքում ՀՀ դեսպանը ներկայացրեց Հայաստանի անվտանգային իրավիճակը, Եվրոպական Միության և Սերբիայի հետ ՀՀ հարաբերությունները, պատասխանեց գործընկերների հարցերին:

Նույն օրը ՀՀ դեսպան Աշոտ Հովակիմյանը ներկա գտնվեց Բելգրադում մեկնարկած Եվրոպայի բոքսի առաջնության հանդիսավոր բացման արարողությանը, հանդիպելով և հաղոջություն մաղթելով ՀՀ ազգային հավաքականի մարզիկներին և մարզիչներին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր