Պրահայում տեղի ունեցավ Կրոնի և հավատքի ազատության միջազգային դաշինքի տարեկան նախարարական համաժողովը

28 նոյեմբերի, 2023

Նոյեմբերի 28-30-ին Պրահայում տեղի ունեցավ Կրոնի և հավատքի ազատության միջազգային դաշինքի տարեկան նախարարական համաժողովը, որը կազմակերպել էին Չեխիայի Արտաքին գործերի նախարարությունը և Դաշինքի քարտուղարությունը: Համաժողովին մասնակցեցին ՀՀ դեսպան Աշոտ Հովակիմյանը և ՀՀ ԱԳ նախարարի խորհրդական, Դաշինքում ՀՀ ներկայացուցիչ Մարթա Այվազյանը:

Համաժողովի շրջանակներում դեսպան Հովակիմյանը հանդես եկավ ազգային ելույթով, ընդգծելով աշխարհի տարբեր մասերում տեղի ունեցող մարտահրավերների լույսի ներքո կրոնի ազատության հիմնարար իրավունքի պաշտպանության, ինչպես նաև հակամարտությունների ժամանակ կրոնական պաշտամունքի վայրերի և այլ կրոնական ժառանգության, այդ թվում Լեռնային Ղարաբաղում հայկական հոգևոր-մշակութային ժառանգության պաշտպանության կարևորությունը: Լեռնային Ղարաբաղի հայ բնակչությունը էթնիկ զտմանն ենթարկելուց հետո, Ադրբեջանն այն ենթարկում է մշակութային և քաղաքակրթական զտման:

Հայկական պատվիրակությունը հանդիպումներ ունեցավ Մեծ Բրիտանիայի խորհրդարանի անդամ, կրոնի և հավատքի ազատության ՄԹ վարչապետի հատուկ բանագնաց, Դաշինքի նախագահող Ֆիոնա Բրյուսի, ԱՄՆ նախկին սենատոր և Դաշինքի համանախագահ, դեսպան Սեմ Բրաունբեքի, Լորդ Դեյվիդ Ալթոնի, բազմաթիվ այլ մասնակիցների հետ:

Սեմինարի մասնակիցների համար ընդունելություններ կազմակերպվեցին Չեխիայում Մեծ Բրիտանիայի և ԱՄՆ դեսպանների կողմից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր