Սլովենիայում ՀՀ դեսպան Աշոտ Հովակիմյանը Լյուբլյանայում մասնակցեց դիվանագիտական համաժողովի հանդիսավոր բացմանը

15 մայիսի, 2023

Մայիսի 15-ին Սլովենիայում ՀՀ դեսպան Աշոտ Հովակիմյանը Լյուբլյանայում մասնակցեց «Ցեղասպանության, մարդկության դեմ ոճրագործությունների, պատերազմական հանցագործությունների և այլ միջազգային հանցագործությունների հետաքննության և հետապնդման ոլորտում միջազգային համագործակցության մասին» կոնվենցիայի (MLA Convention) ընդունման դիվանագիտական համաժողովի հանդիսավոր բացմանը: Կոնֆերանսի աշխատանքներին Հայաստանը, որպես դիտորդ երկիր, ներկայացնում էր ՀՀ ԱԳՆ առաջին քարտուղար Զոյա Ստեփանյանը:

Նույն օրը ՀՀ դեսպանին ընդունեց Սլովենիայի Բարձրագույն կրթության, գիտության և նորարարությունների նախարար Իգոր Պապիչը: Հանդիպման ընթացքում քննարկվեցին Հայաստանի և Սլովենիայի միջև վերոհիշյալ ոլորտներում համագործակցության խթանման հեռանկարները, ԵՄ ուսումնական ծրագրերի շրջանակներում ուսանողների փոխանակման հնարավորությունները:

Սլովենիայի Արտաքին և եվրոպական գործերի նախարարության պետական քարտուղար Սամուել Ժբոգարի, Սլովենիայի նախագահի՝ արտաքին քաղաքականության հարցերով խորհրդական Միրիամ Մոժգանի և ԱԵԳՆ Արևելյան Եվրոպայի, Հարավային Կովկասի, Կենտրոնական Ասիայի և Արկտիկայի վարչության տնօրեն Բերտա Մրակի հետ հանդիպումները կենտրոնացած էին երկկողմ օրակարգի ընդլայնման, բարձրաստիճան այցերի կազմակերպման, քաղաքական խորհրդակցությունների անցկացման, միջազգային կազմակերպությունների շրջանակներում համագործակցության վրա:

ՀՀ դեսպանը մանրամասն ներկայացրեց տարածաշրջանային զարգացումները, ընդգծեց Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված իրավիճակի, հայ ռազմագերիների վերադարձի և մարդասիրական բնույթի մյուս խնդիրների հասցեագրման կարևորությունը, նշելով, որ Ադրբեջանի կողմից սադրիչ և ագրեսիվ գործողությունները չեն նպաստում տարածաշրջանում երկարատև խաղաղություն հաստատելու ջանքերին:

Դեսպանը հանդիպում ունեցավ նաև «Մարդու անվտանգության խթանում» (ITF) հիմնադրամի տնօրեն, դեսպան Տոմաժ Լովրենչիչի հետ, գոհունակություն հայտնելով 2022թ. հիմնադրամի կողմից «Լեռնային Ղարաբաղում զինված հակամարտությունից տուժած երեխաների հոգեբանական-սոցիալական վերականգնում» ծրագրի իրագործման կապակցությամբ: Քննարկվեցին զինված հակամարտություններից տուժած երեխաների վերականգնման ծրագրի երկու տարով երկարաձգելու Սլովենիայի կառավարության որոշման մանրամասները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր