Բոսնիայի և Հերցեգովինայի մայրաքաղաք Սարայևոյի քաղաքապետ Բենյամինա Կարիչի հրավերով, ՀՀ դեսպան Աշոտ Հովակիմյանը մասնակցեց Սարայևոյի օրվա (ապրիլի 6-ին) տոնակատարություններին և Սարայևոյի քաղաքային խորհրդի հանդիսավոր նիստին

05 ապրիլի, 2023

Ապրիլի 5-7-ին, Բոսնիայի և Հերցեգովինայի մայրաքաղաք Սարայևոյի քաղաքապետ Բենյամինա Կարիչի հրավերով, ՀՀ դեսպան Աշոտ Հովակիմյանը մասնակցեց Սարայևոյի օրվա (ապրիլի 6-ին) տոնակատարություններին և Սարայևոյի քաղաքային խորհրդի հանդիսավոր նիստին:

Ապրիլի 5-ին ՀՀ դեսպանին ընդունեց Բոսնիայի և Հերցեգովինայի արտաքին գործերի նախարարի տեղակալ Յոսիպ Բրկիչը: Քննարկվեցին երկկողմ հարաբերությունների զարգացման, քաղաքական խորհրդատվությունների անցկացման, միջազգային կազմակերպություններում համագործակցության հարցեր: Դեսպանը հանդիպում ունեցավ նաև արտգործնախարարության Կենտրոնական և Արևելյան Եվրոպայի վարչության տնօրեն Յասմինկա Այանովիչի հետ:

Նույն օրը դեսպանին ջերմորեն ընդունեց Վերին Բոսնիայի (Սարայևոյի) արքեպիսկոպոս Տոմո Վուկշիչը, որն իր համակրանքն արտահայտեց հայ ժողովրդի, հայ եկեղեցու և մշակույթի նկատմամբ:

Ապրիլի 6-ին ՀՀ դեսպանն այցելեց Բոսնիայում և Հերցեգովինայում Բարձր հանձնակատարի գրասենյակ, ուր հյուրընկալվեց Բարձր հանձնակատար Քրիստիան Շմիդտի կողմից: Քննարկվեցին տարածաշրջանային մարտահրավերները, ԵՄ հետ Բոսնիայի և Հերցեգովինայի ինտեգրման գործընթացները:

Ապրիլի 7-ին ՀՀ դեսպանը հանդիպեց Բոսնիայի և Հերցեգովինայի Խորհրդարանական վեհաժողովի Ժողովուրդների տան նախագահողի առաջին տեղակալ Կեմալ Ադեմովիչի, ինչպես նաև Խորհրդարանի Ներկայացուցիչների տան արտաքին հարաբերությունների հանձնաժովովի նախագահի առաջին տեղակալ Սաբինա Չուդիչի հետ: Դեսպանը շնորհավորեց զրուցակիցներին Բոսնիայի և Հերցեգովինայի՝ ԵՄ թեկնածության կարգավիճակ ստանալու կապակցությամբ, առաջարկեց համագործակցություն և ուղիղ կապեր հաստատել երկու երկրների խորհրդարանների միջև:

Դեսպանին ընդունեց Սարայևոյի քաղաքապետ Բենյամինա Կարիչը, որը գոհունակությամբ արձանագրեց հարաբերությունների առաջընթացը, պատրաստակամություն հայտնեց մայրաքաղաքների միջև համագործակցություն հաստատել:

Բոլոր հանդիպումներին անդրադարձ է կատարվել նաև տարածաշրջանային անվտանգության և խաղաղության հարցերի: ՀՀ դեսպանը ներկայացրել է Հայաստանի և Լեռնային Ղարաբաղի նկատմամբ Ադրբեջանի ագրեսիաների արդյունքում տարածաշրջանում ստեղծված իրավիճակը, Լաչինի միջանցքի արգելափակման հետևանքով Լեռնային Ղարաբաղում առկա հումանիտար ճգնաժամի մանրամասները: Ընդգծվում էր Արդարադատության միջազգային դատարանի կողմից փետրվարի 22-ին կայացված որոշման իրագործման կարևորությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր