ՀՀ դեսպան Աշոտ Հովակիմյանը հանդիպում ունեցավ Խորվաթիայի խորհրդարանի Խորվաթիա-Հայաստան պատգամավորական բարեկամական խմբի ղեկավար Դավոր Իվո Շտիրի և խմբի անդամների հետ

15 դեկտեմբերի, 2022

Դեկտեմբերի 15-ին ՀՀ դեսպան Աշոտ Հովակիմյանը Զագրեբում հանդիպում ունեցավ Խորվաթիայի խորհրդարանի Խորվաթիա-Հայաստան պատգամավորական բարեկամական խմբի ղեկավար Դավոր Իվո Շտիրի և խմբի անդամների հետ։ Հանդիպմանը մասնակցում էր նաև Խմբի անդամ, Խորվաթիայի խորհրդարանի փոխնախագահ Դավորկո Վիդովիչը:

Անդրադարձ կատարվեց ՀՀ Ազգային ժողովում Հայաստան-Խորվաթիա բարեկամական խմբի հետ հարաբերությունների ակտիվացման, ստեղծված բարդ տարածաշրջանային իրավիճակում խորհրդարանական միջազգային հարթակներում գործակցության հնարավորություններին:

Նույն օրը Լյուբլյանայում դեսպան Հովակիմյանին ընդունեց Սլովենիայի վարչապետի աշխատակազմի ազգային և միջազգային անվտանգության հարցերով պետքարտուղար Անդրեյ Բենեդեյչիչը: Հանդիպման ընթացքում քննարկվեցին տարածաշրջանային անվտանգությանը վերաբերող հարցեր, միջազգային կառույցներում համագործակցության հնարավորություններ:

Սլովենիայի Ազգային ժողովի Սլովենիա-Հայաստան պատգամավորական բարեկամական նորակազմ խմբի նախագահ Դեյան Պրեմիկի և խմբի անդամների հետ հանդիպման ընթացքում քննարկվեցին Հայաստան-Սլովենիա բարեկամական խմբի հետ հարաբերությունների շարունակականության պահպանման, ինչպես նաև մոտ ժամանակներս երկու խմբերի միջև առցանց հանդիպման անցկացման, խորհրդարանական միջազգային հարթակներում գործակցության հնարավորությունները։

Սլովենիայի ԱԳՆ Ընդհանուր արտաքին և անվտանգության քաղաքականության տնօրինության գլխավոր տնօրեն Մատեյա Նորչիչ Շտամցարի և Արևելյան Եվրոպայի, Հարավային Կովկասի, Կենտրոնական Ասիայի և Արկտիկայի վարչության պետ Բերտա Մրակի հետ հանդիպման ընթացքում քննարկվեցին երկկողմ հարաբերությունների ակտիվացման, ներառյալ բարձրաստիճան այցերի կազմակերպման, հեռանկարները, Հարավային Կովկասում և Արևմտյան Բալկաններում տեղի ունեցող զարգացումները, միջազգային հարթակներում համագործակցությունը։

Հանդիպումների ընթացքում դեսպան Հովակիմյանը ներկայացրեց սեպտեմբերի 13-14-ի ՀՀ սուվերեն տարածքի վրա ադրբեջանական ագրեսիայի և Լաչինի միջանցքով տեղաշարժի արգելափակման հետևանքները, շեշտելով, որ Արցախը կանգնած է հումանիտար ճգնաժամի սպառնալիքի առջև։ Դեսպան Հովակիմյանն ընդգծեց, որ Ադրբեջանի ղեկավարության գործողությունները, ռազմատենչ հռետորաբանությունը և առավելապաշտական մոտեցումը լրջորեն վտանգում են Հարավային Կովկասում խաղաղության և կայունության հասնելու հնարավորությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր