Սերբիայում ՀՀ դեսպան Աշոտ Հովակիմյանին ընդունեց Սերբիայի Հանրապետության Ազգային Ժողովի նախագահ Վլադիմիր Օրլիչը

13 դեկտեմբերի, 2022

Դեկտեմբերի 13-ին Սերբիայում ՀՀ դեսպան Աշոտ Հովակիմյանին ընդունեց Սերբիայի Հանրապետության Ազգային Ժողովի նախագահ Վլադիմիր Օրլիչը:

Դեսպան Հովակիմյանը և Վլադիմիր Օրլիչը քննարկեցին երկկողմ ոլորտում և բազմակողմ խորհրդարանական հարթակներում համագործակցության զարգացման հեռանկարները:

Սերբիայի Ազգային Ժողովի Հայաստանի հետ բարեկամության խորհրդարանական խմբի նախագահ Ալեքսանդար Չոտրիչի և խմբի անդամների հետ հանդիպման ընթացքում անդրադարձ կատարվեց ՀՀ Ազգային ժողովում Հայաստան-Սերբիա բարեկամական խմբի հետ հարաբերությունների ակտիվացման, ստեղծված բարդ տարածաշրջանային իրավիճակում խորհրդարանական միջազգային հարթակներում գործակցության հնարավորություններին:

Սերբիայի Ազգային Ժողովի Արտաքին հարաբերությունների հանձնաժողովի նախագահ Բորկո Ստեֆանովիչի հետ քննարկվեցին ՀՀ ԱԺ Արտաքին հարաբերությունների մշտական հանձնաժողովի հետ կապերի զարգացումը, միջազգային խորհրդարանական կազմակերպությունների շրջանակներում համագործակցության հեռանկարները:

Բոլոր հանդիպումների ընթացքում դեսպան Հովակիմյանը ներկայացրեց սեպտեմբերի 13-14-ի ՀՀ սուվերեն տարածքի վրա ադրբեջանական ագրեսիայի և Լաչինի միջանցքով տեղաշարժի արգելափակման հետևանքները, շեշտելով, որ Արցախը կանգնած է հումանիտար ճգնաժամի սպառնալիքի առջև։ Դեսպան Հովակիմյանն ընդգծեց, որ Ադրբեջանի ղեկավարության գործողությունները, ռազմատենչ հռետորաբանությունը և առավելապաշտական մոտեցումը լրջորեն վտանգում են Հարավային Կովկասում խաղաղության և կայունության հասնելու հնարավորությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր