ՀՀ դեսպան Աշոտ Հովակիմյանի աշխատանքային այցը Սերբիայի Վոևոդինա երկրամասի Նովի Սադ մայրաքաղաք

02 մարտի, 2022

Մարտի 1-2-ին ՀՀ դեսպան Աշոտ Հովակիմյանին՝ Սերբիայի Վոևոդինա երկրամասի Նովի Սադ մայրաքաղաք աշխատանքային այցի շրջանակներում ընդունեցին Նովի Սադի քաղաքապետ Միլոշ Վուչևիչը և քաղաքային խորհրդի նախագահ Յելենա Մարինկովիչ Ռադոմիրովիչը: Կողմերն անդրադարձան Նովի Սադի, որպես 2022թ. Եվրոպայի մշակութային մայրաքաղաքի, հետ համագործակցությանը, Գյումրի և Նովի Սադ քաղաքների միջև գործընկերային հարաբերությունների հաստատմանը, տնտեսական, մշակութային, բարձր տեխնոլոգիաների և այլ ոլորտներում համագործակցության հնարավորությանը, հատկապես, հաշվի առնելով Նովի Սադում հայերի պատմական ներկայությունը և մշակութային ժառանգությունը:

ՀՀ դեսպանն այցելեց Նովի Սադի համալսարան և հանդիպում ունեցավ համալսարանի ռեկտոր Դեյան Մադիչի և միջազգային համագործակցության հարցերով փոխռեկտոր Սաբինա Խալուպկա-Ռեշետարի հետ: Քննարկվեցին ՀՀ համալսարանների հետ համագործակցության հեռանկարները և գործընկերային կապերի հիմնումը, համատեղ միջոցառումների անցկացման և ուսանողների փոխանակման հնարավորությունները:

ՀՀ դեսպան Աշոտ Հովակիմյանն այցելեց Նովի Սադ քաղաքի թանգարանում Եվրոպայի մշակութային մայրաքաղաքի միջոցառումների շրջանակներում բացված և քաղաքի պատմությանը նվիրված «Ակցենտներ» ցուցահանդեսը, որտեղ ներկայացված են նաև Նովի Սադի հայկական պատմական ժառանգության նմուշները, հատկապես, Նովի Սադի կենտրոնում մինչև 1963թ. կանգուն մնացած հայկական եկեղեցու հայերեն ցուցանակը: Շրջայցի ընթացքում դեսպանին ուղեկցում էր ցուցահանդեսի կազմակերպիչ, «Նովի Սադի հայկական եկեղեցի» մենագրության հեղինակ Լյիլյանա Լազիչը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր