Դեսպանի աշխատանքային հանդիպումները Դուբրովնիկում

04 փետրվարի, 2022

Փետրվարի 4-ին ՀՀ դեսպան Աշոտ Հովակիմյանին Դուբրովնիկում ընդունեց Խորվաթիայի Դուբրովնիկի-Ներետվայի տարածաշրջանի Ժուպան (մարզպետ) Նիկոլա Դոբրոսլավիչը: Քննարկվեցին Հայաստանի և Դուբրովնիկի-Ներետվայի տարածաշրջանի միջև ապակենտրոնացված համագործակցության, մշակութային և կրթական ծրագրերի իրականացման հնարավորությունները՝ հիմնված երկու ժողովուրդների միջև գոյություն ունեցող խորը պատմական և հոգևոր արմատների վրա:

Դուբրովնիկի քաղաքապետ Մատո Ֆրանկովիչի, փոխքաղաքապետ Յելկա Տեպշիչի և քաղաքային խորհրդի նախագահ Մարկո Պոտրեբիցայի հետ հանդիպման ընթացքում երկուստեք գոհունակությամբ արձանագրվեց Սուրբ Վլախի տոնակատարություններին ՀՀ դեսպանի մասնակցությունը և Հայաստանին նվիրված միջոցառման անցկացումը: Շարունակվեցին նախորդ տարիներին մեկնարկած քննարկումները Դուբրովնիկի և Գյումրիի միջև գործընկերային հարաբերությունների հաստատման, Դուբրովնիկի քաղաքապետի գլխավորած պատվիրակության ՀՀ այցելության, մշակութային և կրթական համագործակցության ընդլայնման վերաբերյալ:

Դուբրովնիկի համալսարանում ՀՀ դեսպանին հյուրընկալեցին միջազգային համագործակցության և գիտության գծով փոխռեկտոր Մարիյանա Պեչարևիչը և ուսումնառության գծով փոխռեկտոր Սանյա Ժայա Վրբիցան, որոնք ներկայացրեցին համալսարանի պատմությունը, կառուցվաքը, կրթական և գիտական ծրագրերը, ապագայի հեռանկարները: Մեծ ոգևորությամբ ընդունվեց ՀՀ դեսպանի առաջարկը՝ հայաստանյան բուհերի հետ համագործակցության հաստատման վերաբերյալ, հատկապես այն դեպքում, երբ համալսարանն արդեն ներկայացրել է Erasmus+ ծրագրի շրջանակներում Հայաստանի ազգային ագրարային համալսարանի հետ համատեղ նախագիծ կիրառական էկոլոգիայի բնագավառում: Խոսք գնաց նաև պատմության, արվեստի պատմության, պատմական հուշարձանների վերականգնման ոլորտներում կրթական և գիտական համագործակցության մասին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր