ՀՀ դեսպան Աշոտ Հովակիմյանի աշխատանքային այցը Զագրեբ

03 դեկտեմբերի, 2021

Դեկտեմբերի 3-ին Զագրեբում տեղի ունեցավ ՀՀ դեսպան Աշոտ Հովակիմյանի հանդիպումը Խորվաթիայի խորհրդարանի Խորվաթիա-Հայաստան պատգամավորական բարեկամական խմբի ղեկավար Դավոր Իվո Շտիրի և խմբի անդամների հետ։ Կողմերը բարձր գնահատեցին երկկողմ հարաբերությունների զարգացման դինամիկան, կարևորելով նմանատիպ հանդիպումների հաճախակի անցկացումը, ինչպես նաև երկկողմ բարձրաստիճան այցերի իրականացումը։

Դեսպանն արձանագրեց, որ ՀՀ Ազգային ժողովում արդեն իսկ վերակազմավորվել է Հայաստան–Խորվաթիա խորհրդարանական բարեկամական խումբը, հույս հայտնելով, որ խմբերի միջև կհաստատվի արդյունավետ համագործակցություն։ Պարոն Շտիրը հայտնեց իր պատրաստակամությունը՝ մոտ ժամանակներս կազմակերպելու օնլայն հարթակով հանդիպում երկու խմբերի միջև։

Խորվաթիա-Հայաստան պատգամավորական բարեկամական խմբի անդամների խնդրանքով՝ հանգամանալից ներկայացվեցին Ադրբեջանի կողմից սանձազերծված ագրեսիայի հետևանքները, բանակցությունների ներկայիս ընթացքը, ինչպես նաև ՀՀ սահմանին տիրող իրավիճակը և վերջին զարգացումները։

Նույն օրը երեկոյան, ՀՀ անկախության 30 ամյակի կապակցությամբ և ՀՀ դեսպանի պատվավոր հովանավորության ներքո, Զագրեբի համալսարանի Երաժշտական ակադեմիայում տեղի ունեցավ հանրահռչակ դաշնակահար Ռուբեն Դալիբալթայանի մենահամերգը և ձայներիզի ներկայացումը: Կատարվեցին Կոմիտասի, Առնո Բաբաջանյանի և Արամ Խաչատրյանի ստեղծագործությունները։ Համերգից հետո ներկաների համար դեսպանության կողմից կազմակերպվեց ընդունելություն, որին ներկա էին Խորվաթիայի ԱԵԳՆ աշխատակիցներ, խորհրդարանի անդամներ, դիվանագետներ, մշակույթի և գիտության գործիչներ, խորվաթահայ հայրենակիցներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր