ՀՀ դեսպան Աշոտ Հովակիմյանը աշխատանքային այցով գտնվում էր Սերբիայի Վոյևոդինայի մայրաքաղաք Նովի Սադ քաղաքում

13 մարտի, 2020

Մարտի 13-ին, Սերբիա կատարած աշխատանքային այցի շրջանակներում, ՀՀ դեսպան Աշոտ Հովակիմյանը գտնվում էր Վոյևոդինայի մայրաքաղաք Նովի Սադում: Դեսպանին ընդունեցին Վոյևոդինայի ինքնավար երկրամասի մարզային կառավարության նախագահ Իգոր Միտրովիչը և Նովի Սադի քաղաքապետ Միլոշ Վուչևիչը: Հանդիպումների ընթացքում քննարկվեցին Վոյևոդինայի և Շիրակի մարզերի, ինչպես նաև Նովի Սադ և Գյումրի քաղաքների միջև գործընկերային կապերի հաստատման, մշակութային, տնտեսական, գիտական համագործակցության խթանման հեռանկարները: Նման նախնական պայմանավորվածություն էր ձեռք բերվել ՀՀ և Սերբիայի նախագահների միջև՝ ՀՀ Նախագահ Արմեն Սարգսյանի Սերբիա կատարած այցի ընթացքում: Անդրադարձ եղավ նաև ,,Նովի Սադ – 2021թ. Եվրոպայի մշակութային մայրաքաղաք,, ծրագրի շրջանակներում հայ արվեստագետների մասնակցության հնարավորությանը, հաշվի առնելով Նովի Սադում հայերի պատմական ներկայությունը:
Դեսպանն այցելեց Նովի Սադի կենտրոնական մասում գտնվող երբեմնի հայկական եկեղեցու վայրը և ծաղիկներ դրեց Հայ-սերբական բարեկամության և 1988թ. երկրաշարժի ընթացքում Հայաստան հումանիտար օգնություն տեղափոխող հարավսլավական օդանավի զոհված անձնակազմի հիշատակին կանգնեցված խաչքարին, ինչպես նաև Նովի Սադի հայ մեծահարուստ Ջանազիզյանների (Չենազիների) դամբարանին: Նա նաև շրջայց կատարեց Պետրովարադինի բերդում գտնվող Նովի Սադ քաղաքի թանգարանում, ուղեկցությամբ թանգարանի տնօրեն Վեսնա Իկովիչի և ՙՙՆովի Սադի հայկական եկեղեցի,, մենագրության հեղինակ Լյիլյանա Լազիչի: Թանգարանում են պահպանվել երբեմնի հայկական եկեղեցուց մնացած բազմաթիվ նմուշներ:
Հայերը Բելգրադից Նովի Սադ էին տեղափոխվել 18-րդ դարի կեսերին, թուրք-ավստրիական պատերազմի բռնկման և թուրքերի կողմից Բելգրադի գրավման պատճառով: Թեև Նովի Սադի հայերի թիվը նույինսկ լավագույն ժամանակներում հազիվ էր գերազանցում հարյուր հոգի, նրանք էական դեր էին խաղում քաղաքի հասարակական, տնտեսական, ֆինանսական կյանքում: 1746թ. Նովի Սադում կառուցված հայկական եկեղեցին քանդվեց 1963թ.՝ քաղաքի կենտրոնի վերակառուցման պատճառով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր