ՀՀ դեսպան Աշոտ Հովակիմյանի աշխատանքային այցը Չեռնոգորիա

12 մարտի, 2026

Մարտի 11-12-ին ՀՀ դեսպան Աշոտ Հովակիմյանն աշխատանքային այցով գտնվում էր Չեռնոգորիայում: ՀՀ դեպանին ընդունեցին Չեռնոգորիայի Արտաքին գործերի նախարարության պետական քարտուղար Պերիշա Կաստրատովիչը և Կրթության, գիտության և նորարարության նախարարության պետական քարտուղար Տատյանա Չալասանը: Հանդիպումներ կայացան Չեռնոգորիայի նախագահի արտաքին քաղաքականության հարցերով խորհրդական Իրենա Պրելևիչի, վարչապետի արտաքին քաղաքականության հարցերով խորհրդական Միլիցա Պերիշիչի, ԱԳՆ հյուպատոսական հարցերի և հայրենակիցների հետ համագործակցության գլխավոր տնօրինության գլխավոր տնօրեն Իվանա Ջուկանովիչի և միջազգային իրավական հարցերի գլխավոր տնօրինության գլխավոր տնօրեն Իվանա Շիկմանովիչի, Կրթության, գիտության և նորարարության նախարարության նորարարության և խելացի մասնագիտացման գլխավոր տնօրեն Սավիցա Վույիչիչի հետ:

Քննարկվել է երկկողմ հարաբերությունների լայն օրակարգ․ հատկապես, ընթացիկ տարում Հայաստանում կայանալիք Եվրոպական քաղաքական համայնքի 8-րդ գագաթնաժողովին և ՄԱԿ Կենսաբազմազանության մասին կոնվենցիայի կողմերի 17-րդ համաժողովին (COP17) Չեռնոգորիայի մասնակցության վերաբերող հարցեր, երկկողմ բարձրաստիճան այցերի և քաղաքական խորհրդակցությունների անցկացման ժամանակացույցը, հստակեցվել է իրավապայմանագրային դաշտը, մանրամասն անդրադարձ է կատարվել հյուպատոսական և միգրացիայի հարցերին։

Կարևորվել է ՀՀ-ԵՄ գործընկերության ընդլայնումն ու հնարավորությունների լավագույն իրացումը և ընդծվել Չեռնոգորիայի՝ ԵՄ-ին անդամակցելու գործընթացը՝ որպես կարևոր ուղենիշ ՀՀ-ԵՄ գործընկերության ապագա խորացման համար։

ՀՀ դեսպանը զրուցակիցներին է ներկայացրել տարածաշրջանային ընթացիկ զարգացումները՝ այս համատեքստում նաև ներկայացնելով Վաշինգտոնյան համաձայնություններից հետո Հարավային Կովկասում ընթացող դրական դինամիկան: Զրուցակիցներն անդրադարձ են կատարել Մերձավոր Արևելքում ստեղծված իրավիճակին:

Կրթության, գիտության և նորարարության նախարարությունում քննարկվեցին Հայաստանի Հանրապետության և Չեռնոգորիայի կառավարությունների միջև կրթության, գիտության և նորարարության ոլորտներում համագործակցության մասին միջկառավարական համաձայնգրի ստորագրման ընթացակարգը, ինչպես նաև ստեղծարար կրթության, նորարարությունների և ստարտափերի բնագավառներում համագործակցությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր