Սեպտեմբերի 27-ին Խորվաթիայի ծովափնյա Բիոգրադ նա Մորու հանգստավայրում նշվեց Հայաստանի Հանրապետութւան Անկախության 34-ամյակը

27 սեպտեմբերի, 2025

Սեպտեմբերի 27-ին Խորվաթիայի ծովափնյա Բիոգրադ նա Մորու հանգստավայրում նշվեց Հայաստանի Հանրապետութւան Անկախության 34-ամյակը: Միջոցառումը կազմակերպել էին Բիոգրադ նա Մորուի քաղաքապետարանը, Խորվաթիայում ՀՀ դեսպանությունը և Հայ-խորվաթական միությունը: Բացման ելույթներով հանդես եկան Բիոգրադ նա Մորուի քաղաքապետ Իվան Կնեզը և Խորվաթիայում ՀՀ դեսպան Աշոտ Հովակիմյանը, որոնք հարգանքի տուրք մատուցեցին հայազգի ճարտարապետ, գործարար, բարերար Վահան Մելիք Կարագանյանի (1889-1977) հիշատակին:

Ըստ հասանելի տեղեկությունների, Վահան Մելիք Կարագանյանը տեղափոխվեց Հարավսլավիա 1920-աններին, հիմնելով շինարարական կազմակերպություն, որն իրականացրեց Բիոգրադ նա Մորու քաղաքի հիվանդանոցի շինարարությունը: Կարագանյանը որոշում է բնակվել քաղաքում և զբաղվել նրա վերակառուցմամբ, երազելով այն դարձնել ,,հարավսլավական Նիցցա,,: Այդ նպատակով նա սկսում է զբոսաշրջության զարգացմանն ուղղված բազմաթիվ ծրագրեր, կառուցում քաղաքի ամենահեղինակավոր ՙՙԻլիրիա,, հյուրանոցը, իրականացնում շրջապատի ամբողջական էլեկտրիֆիկացում և այլն:

Երկրորդ համաշխարհային պատերազմից հետո, 1945թ. Հարավսլավիայի կոմունիստական իշխանությունները ձեռբակալեցին Կարագանյանին և բռնագրավվեցին նրա ողջ ունեցվածքը, դատապարտելով նրան 10 տարվա ազատազրկման և ուղղիչ աշխատանքների: Ազատվելով ճամբարից, նա տեղափոխվեց Բելգրադ, որտեղ վախճանվեց 1977թ.:

Սակայն Վահան Մելիք Կարագանյանի մասին հիշատակը այնքան վառ էր պահպանվում քաղաքում, որ 2024թ. սեպտեմբերի 21-ին քաղաքի կենտրոնում տեղադրվեց նրա արձանը, և որոշվեց, որ Հայաստանի Հանրապետության Անկախության օրվա նշումը կդառնա ավանդական:

Բիոգրադ նա Մորուի քաղաքային պատկերասրահում բացվեց Խորվաթիայում բնակվող հայ տաղանդավոր արվեստագետ, Հայ-խորվաթական միության նախագահ Ալինա Գիշյանի խեցեգործության ցուցահանդեսը: Այնուհետև խորվաթ դաշնակահարուհի Էվա Կիրխմայեր-Բիլիչը և հայ դաշնակահարուհի Լիլիթ Մարտիրոսյանի նվագակցությամբ, սոպրանո Անտոնիա Ժարկովիչը կատարեց հայ, խորվաթ և միջազգային հայտնի կոմպոզիտորների գործերը: Միջոցառման ավարտին ցուցադրվեց Հայաստանի մասին կինոնկար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր