ՀՀ դեսպան Աշոտ Հովակիմյանի աշխատանքային այցը Չեխիայի Հարավային Բոհեմիայի երկրամաս

19 փետրվարի, 2024

Փետրվարի 19-ին կայացավ ՀՀ դեսպան Աշոտ Հովակիմյանի աշխատանքային այցը Չեխիայի Հարավային Բոհեմիայի երկրամաս և հանդիպումն երկրամասի ղեկավար Մարտին Կուբայի հետ, որը ներկայացրեց երկրամասի նկարագիրը և տնտեսական զարգացման հիմնական ուղղությունները: Դեսպանը տեղեկացրեց հայ-չեխական փոխգործակցության երկկողմ օրակարգի, Հայաստանի ու Չեխիայի միջև միջտարածաշրջանային համագործակցության առկա փորձի, Հայաստանի շուրջ ստեղծված անվտանգային իրավիճակի վերաբերյալ:

Չեսկե Բուդեյովիցեի քաղաքապետ Դագմար Շկոդովա Պարմովայի հետ հանդիպման ընթացքում քննարկվեցին գիտական, տնտեսական, մշակութային ոլորտներում փոխգործակցության ակտիվացման, քաղաքում հայկական պատմամշակութային ժառանգությանը նվիրված ցուցահանդեսի կազմակերպման հնարավորությունը:

Այցի շրջանակներում դեսպանը հանդիպում ունեցավ Հարավային Բոհեմիայի համալսարանի ռեկտոր Բոհումիլ Յիրոուշեկի հետ և վերջինիս ուղեկցությամբ շրջայց կատարեց համալսարանում: Հանդիպմանը մասնակցող արտաքին կապերի գծով պրոռեկտոր Ռադկա Զավոդսկան ներկայացրեց համալսարանի կառուցվածքային ու գործունեության ուղղությունների առանձնահատկությունները, հայաստանյան գործընկերների` Վալերի Բրյուսովի անվան պետական համալսարանի հետ Էրազմուս+ Միջազգային կրեդիտային շարժունության ծրագրի շրջանակներում 2020-2023թթ. իրականացված դասավանդման/վերապատրաստման հնարավորության նախագծի, և 2023-2026թթ. Էրազմուս+ նույն ծրագրի շրջանակներում Հայաստանի ազգային ագրարային համալսարանի հետ նախատեսվող նախագծի մանրամասները:

Այցի ընթացքում դեսպանը հարգանքի տուրք մատուցեց չեխ գրող, ճանապարհորդ, հումանիստ, հայ ժողավրդի բարեկամ, Հայոց ցեղասպանության փաստագրությունը ներկայացնող «Արևելքի արհավիրքները» գրքի հեղինակ Կարել Հանսայի հիշատակին, այցելելով և ծաղիկներ զետեղելով Հանսաների ընտանեկան գերեզմանին և Հանսային նվիրված հուշատախտակին այն տան պատին, որտեղ նա անցկացրել էր մանկության ու պատանեկության տարիները։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր