ՀՀ դեսպան Աշոտ Հովակիմյանն աշխատանքային այցով գտնվում էր Չեխիայի Ուստեցկի երկրամասում

10 օգոստոսի, 2023

Օգոստոսի 10-ին ՀՀ դեսպան Աշոտ Հովակիմյանն աշխատանքային այցով գտնվում էր Չեխիայի Ուստեցկի երկրամասում: Ուստի նադ Լաբեմ քաղաքում դեսպանին ընդունեց Ուստեցկի երկրամասի ղեկավար Յան Շիլլերը, որը ներկայացրեց երկրամասի նկարագիրը և տնտեսական զարգացման հիմնական ուղղվածությունները, քննարկվեցին երկրամասում բնակվող հայերի ինքնակազմակերպման, Հայաստանի և հայկական մշակույթի մասին տեղեկատվության տարածման նպատակով համագործակցության հեռանկարները:

Ուստի նադ Լաբեմի քաղաքապետ Պետր Նեդվեդիցկիի հետ հանդիպման ընթացքում քննարկվեցին գիտական, տնտեսական, մշակութային ոլորտներում փոխգործակցության ակտիվացման, Ուստի նադ Լաբեմում իրականացվող “Կանաչ քաղաք” ծրագրի շուրջ փորձի փոխանակման հնարավորությունները:

Լիտոմերժիցեի քաղաքապետ Ռադեկ Լյովիի հետ դեսպանի հանդիպման ընթացքում անդրադարձ կատարվեց երկու երկրների միջև պատմական առնչություններին և ուրվագծեցին համագործակցության առաջիկա ծրագրերը՝ մասնավորապես, քաղաքում հայկական պատմամշակութային ժառանգությանը, տեսարժան վայրերին և ականավոր գործիչներին նվիրված ցուցահանդեսների կազմակերպման հնարավորությունը:

Հանդիպումների ընթացքում դեսպանը զրուցակիցներին ներկայացրեց Ադրբեջանի կողմից Լաչինի միջանցքի արդեն շուրջ 8 ամիս շարունակվող ապօրինի արգելափակման հետևանքով Լեռնային Ղարաբաղում ահագնացող հումանիտար ճգնաժամի մանրամասները, ընդգծեց հումանիտար իրավիճակի հանգուցալուծման համար միջազգային գործընկերների թիրախային կոչերի և համատեղ քայլերի ձեռնարկման հրամայականը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր