ՀՀ դեսպան Աշոտ Հովակիմյանին ընդունեց Զագրեբի քաղաքապետ Տոմիսլավ Տոմաշևիչը

11 մայիսի, 2023

Մայիսի 11-ին ՀՀ դեսպան Աշոտ Հովակիմյանին ընդունեց Զագրեբի քաղաքապետ Տոմիսլավ Տոմաշևիչը: Հանդիպման ընթացքում քննարկվեին Զագրեբի և Երևանի միջև գործընկերային հարաբերությունների հաստատման հնարավորությունները, հայ-խորվաթական երկկողմ հարաբերությունները:

Դեսպանը զրուցակցին ներկայացրեց տարածաշրջանում անվտանգային իրավիճակը, Ադրբեջանի կողմից Լաչինի միջանցքի ապօրինի արգելափակման հետևանքով ստեղծված հումանիտար ճգնաժամը:

Մայիսի 11-ի երեկոյան Զագրեբի ,,Վեստին,, հյուրանոցում տեղի ունեցավ «Հայաստանը խորվաթների աչքերով» թեմայով պանելային քննարկում, որը նախաձեռնել և կազմակերպել էր Խորվաթիայում բնակվող հայ արվեստագետ Ալինա Գիշյանը՝ հայ համայնքի մի շարք այլ անդամների աջակցությամբ։ Միջոցառումն անցկացվեց Խորվաթիայում ՀՀ դեսպան Աշոտ Հովակիմյանի բարձր հովանավորությամբ և Ֆրանսիայի ՀԲԸՄ օժանդակությամբ:

ՀՀ դեսպանի ողջույնի խոսքից հետո քննարկմանը մասնակցած դաշնակահար Եվա Կիրխմայեր Բիլիչը, գրող Զդրավկո Վամպովացը և պատմաբան Վինիցիյե Լուպիսը ներկայացրեցին Հայաստանն իրենց ուսումնասիրությունների և ճամփորդությունների միջոցով:

Միջոցառման վերջում Եվա Կիրխմայեր Բիլիչը և երգչուհի Կլասյա Մոդրուշանը կատարեցին Կոմիտասի «Չինար ես» երգը։

Ներկաների թվում էին Խորվաթիայի խորհրդարանի Խորվաթիա-Հայաստան բարեկամության խմբի ղեկավար Դավոր Իվո Շտիրը և խմբի անդամներ Դոմագոյ Խայդուկովիչը և Էրիկ Ֆաբիյանիչը, պատմաբաններ, լրագրողներ, արվեստագետներ, Հայաստանի բարեկամներ և Խորվաթիայում բնակվող հայեր։

Մայիսի 12-ին ՀՀ դեսպան Աշոտ Հովակիմյանին ընդունեց Խորվաթիայի Արտաքին և Եվրոպական գործերի բազմակողմ և գլոբալ գործերի գլխավոր տնօրինության գլխավոր տնօրեն Սեբաստիան Ռոգաչը: Դեսպանը հանդիպում ունեցավ նաև նախարարության Եվրասիայի և Օկեանիայի վարչության տնօրեն Դունյա Սիչայայի հետ: Հանդիպումների ընթացքում գոհունակությամբ արձանագրվեցին Հայաստանի և Խորվաթիայի միջև երկկողմ հարաբերությունների ակտիվացման միտումը և համագործակցության ոլորտների ընդլայնումը:

ՀՀ դեսպանը ընդգծեց Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված իրավիճակի, հայ ռազմագերիների վերադարձի և մարդասիրական բնույթի մյուս խնդիրների հասցեագրման կարևորությունը, նշելով, որ Ադրբեջանի կողմից սադրիչ և ագրեսիվ գործողությունները չեն նպաստում տարածաշրջանում երկարատև խաղաղություն հաստատելու ջանքերին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր