ՀՀ դեսպան Աշոտ Հովակիմյանը հանդիպել է Չեխիայի Խորհրդարանի Պատգամավորների պալատի Չեխիա-Հայաստան պատգամավորական բարեկամության խմբի ղեկավար Մարեկ Բենդային

16 դեկտեմբերի, 2022

Դեկտեմբերի 16-ին Չեխիայում ՀՀ դեսպան Աշոտ Հովակիմյանը հանդիպեց Չեխիայի Խորհրդարանի Պատգամավորների պալատի Չեխիա-Հայաստան պատգամավորական բարեկամության խմբի ղեկավար Մարեկ Բենդային։ Դեսպանը զրուցակցին մանրամասն ներկայացրեց դեկտեմբերի 12-ից Ադրբեջանի կողմից Լաչինի միջանցքի արգելափակման հետևանքով առաջացած խնդիրները, Լեռնային Ղարաբաղում էթնիկ զտման շարունակական քաղաքականության փաստերը:

Քննարկվել են Հայաստանի ինքնիշխանության և տարածքային ամբողջականության նկատմամբ ադրբեջանական ագրեսիայի հետևանքներն ու ստեղծված անվտանգային իրավիճակը, Հայաստանի կողմից տարածաշրջանում խաղաղության օրակարգի առաջմղման ուղղությամբ տարվող աշխատանքների ընթացքը:

Հանդիպմանը հետևեց հայտարարությունը, որում նշվում է՝

«Խորապես մտահոգված ենք Լաչինի միջանցքի շարունակվող շրջափակման փաստով: Հրադադարի ռեժիմի պարբերական խախտումներն ու սադրանքները, այժմ 120.000 մարդու կենսապահովման հիմնական աղբյուրից զրկելը հղի է մարդասիրական բնույթի ծանր հետևանքներով։

Ադրբեջանը պետք է վերաբացի միջանցքը, առանց որևէ նախապայմանի ապահովի տեղաշարժի ազատությունն ու անվտանգությունը։ Անհրաժեշտ է շարունակել Լեռնային Ղարաբաղի հիմնախնդրի քաղաքական կարգավորման, սեպտեմբերին Ադրբեջանի կողմից սանձազերծված ագրեսիայից հետո Հայաստանի տարածքային ամբողջականության վերականգնման, և տարածաշրջանում հարատև խաղաղության և կայունության հաստատման շուրջ բանակցությունները»:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր