Ընդունելություն Չեխիայում ՀՀ դեսպանությունում

12 հուլիսի, 2018

Հուլիսի 12-ին Չեխիայում Հայաստանի դեսպանությունն ավանդական ընդունելություն էր կազմակերպել Չեխիայի խորհրդարանի Պատգամավորների պալատի Չեխիա-Հայաստան միջխորհրդարանական բարեկամության խմբի անդամների համար, որին ներկա էին նաև բարեկամության խմբի նախկին նախագահ Րոբին Բյոհնիշը, երկրի արտաքին գերատեսչության ներկայացուցիչը։

Ողջունելով երեկոյի մասնակիցներին՝ Չեխիայում և Սլովակիայում ՀՀ դեսպան Տիգրան Սեյրանյանը ներկայացրեց Հայաստանում տեղի ունեցող ներքին քաղաքական զարգացումները` հատկապես առանձնացնելով պայքարը կոռուպցիայի դեմ։

Անդրադառնալով ՀՀ-ԵՄ հարաբերություններին՝ դեսպանը տեղեկացրեց, որ ԵՄ վեց պետությունների խորհրդարաններ արդեն վավերացրել են Հայաստան-Եվրամիություն համապարփակ և ընդլայնված գործընկերության համաձայնագիրը, իսկ վերջերս դրան իր հավանությունը տվեց նաև Եվրախորհրդարանը։ Այս համատեքստում դեսպան Սեյրանյանը չեխ խորհրդարանականներին հորդորեց առաջիկա նիստերից մեկում անդրադառնալ ՀՀ-ԵՄ համաձայնագրի վավերացման հարցին։

Բարեկամության խմբի նախկին ղեկավար Րոբին Բյոհնիշը հաջողություն մաղթեց խմբին, իսկ նոր ղեկավար Մարեկ Բենդան, ով նախորդ գումարման Պատգամավորների պալատում բարեկամության խմբի ակտիվ անդամներից էր, վստահություն հայտնեց, որ խումբը կշարունակի ակտիվորեն աշխատել հայ-չեխական երկկողմ օրակարգի առաջմղման ուղղությամբ։

Ընդունելությանը մասնակցեցին նաև Չեխիայի հայ համայնքի հոգևոր հովիվ Բարսեղ վարդապետ Փիլավչյանը և Չեխիայի «Ապրիլ 24» կոմիտեի մի շարք անդամներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր