Հայաստանի Նախագահը շնորհակալական նամակ է հղել Չեխիայի ղեկավարին

26 ապրիլի, 2017

Հայաստանի Հանրապետության Նախագահ Սերժ Սարգսյանը շնորհակալական նամակ է հղել Չեխիայի Հանրապետության Նախագահ Միլոշ Զեմանին՝ Չեխիայի խորհրդարանի Պատգամավորների պալատի կողմից Հայոց ցեղասպանությունը դատապարտող բանաձև ընդունելու կապակցությամբ։ Հայաստանի ղեկավարը մասնավորապես նշել է.

«Ձերդ Գերազանցություն,

Երախտագիտության մեծ զգացում ապրեցի՝ ստանալով Չեխիայի Հանրապետության խորհրդարանի Պատգամավորների պալատի կողմից Հայոց ցեղասպանության ճանաչման և դատապարտման վերաբերյալ բանաձևի ընդունման լուրը։

Այս կապակցությամբ շնորհակալություն եմ հայտնում անձամբ Ձեզ՝ հետևողականորեն հորդորելու համար խորհրդարանի ստորին պալատի պատգամավորներին դատապարտել մարդկության դեմ իրագործված այս անմարդկային հանցագործությունը։ Այս քայլը Ձեր և բարեկամ չեխ ժողովրդի ընտրյալների անվերապահ հավատարմության վերահաստատումն էր ժողովրդավարության, մարդու իրավունքների, արդարության բարձր արժեքների նկատմամբ։

Շնորհակալ եմ նաև 24-ին չեխահայերին և աշխարհասփյուռ հայությանն ուղղված Ձեր ցավակցական ուղերձի համար։

Մեծարգո պարոն նախագահ, մաղթում եմ Ձեզ և բարեկամ չեխ ժողովրդին երջանկություն և բարօրություն։»

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր