Դեսպան Սեյրանյանի այցը Չեխիայի Հրադեց Կրալովեի երկրամաս

19 ապրիլի, 2017

Ապրիլի 19-ին Չեխիայում ՀՀ դեսպան Տիգրան Սեյրանյանն այցելեց Հրադեց Կրալովե երկրամասի համանուն մայրաքաղաք, ուր նա հանդիպում ունեցավ Հրադեց Կրալովեի համալսարանի ռեկտոր Կամիլ Կուչայի հետ։

Հանդիպմանը քննարկվեցին կրթության բնագավառում գործակցության հարցեր։ ԲՈՒՀ-ի ղեկավարը տեղեկացրեց, որ համալսարանը, որտեղ նաև հայաստանցի ուսանող է ուսանում, ներգրավված է «Erasmus» և «Erasmus+» ծրագրերում և պատրաստ է ավելի մեծ թվով ուսանողներ ընդունել Հայաստանից։

Այնուհետև, դեսպան Սեյրանյանը համալսարանի փիլիսոփայության ֆակուլտետի քաղաքագիտության ամբիոնի ուսանողադասախոսական կազմի առջև հանդես եկավ «Հայաստանի արտաքին քաղաքականությունը» թեմայով դասախոսությամբ և պատասխանեց ներկաներին հետաքրքրող հարցերին։

Նույն օրը Հրադեց Կրալովեի գիտահետազոտական գրադարանում տեղի ունեցավ Չեխիա-Հայաստան միջխորհրդարանական բարեկամության խմբի ղեկավար, խորհրդարանի Պատգամավորների պալատի շրջակա միջավայրի հարցերի կոմիտեի նախագահ Րոբին Բյոհնիշի հեղինակած «Հայաստանը՝ լեռների, վանքերի և գինու երկիր» երկլեզու (չեխերեն, անգլերեն) պատկերագրքի շնորհանդեսը և համանուն ցուցահանդեսի բացումը։ Չեխ պատգամավորի արած գունեղ լուսանկարներում յուրովի ներկայացվում են Հայաստանի բոլոր մարզերի, մայրաքաղաք Երևանի և Արցախի բնությունը, ճարտարապետական կոթողները և բնակիչները։

Արարողությանը ելույթներ ունեցան հեղինակը, Հրադեց Կրալովեի նահանգապետ Յիրժի Շտեպանը, ՀՀ դեսպանը և դեսպանության խորհրդական Նունե Զաստուխովան։

Տիգրան Սեյրանյանը, շնորհավորելով չեխ պատգամավորին կատարած աշխատանքի համար, վստահություն հայտնեց, որ պատգամավորի և Հայաստանի միջև եղած ամուր կապը կլինի շարունակական։

Հրադեց Կրալովեի երկրամասի նահանգապետն իր խոսքում նշեց, որ 2015 թվականին ստորագրված համագործակցության հուշագրի համաձայն կզարգանան երկրամասի և ՀՀ Տավուշի մարզի միջև կապերը։

Պատկերագրքում զետեղվել են Հայաստանի դեսպանի ու Չեխիայի աշխատանքի և սոցիալական հարցերի սոցիալ-դեմոկրատ նախարար Միխայելա Մակսովա-Տոմինովայի ողջույնի խոսքերը։

Լուսանկարները՝ Հակոբ Ասատրյանի

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր