«Շարժվող մասնիկներ» խորագրով ցուցահանդես Պրահայում

15 փետրվարի, 2017

Փետրվարի 15-ին Պրահայի կենտրոնի Յակուբսկա հեղինակավոր ցուցասրահում (Gаlerie Jakubska) բացվեց երիտասարդ հայ նկարիչ Նարեկ Վան Աշուղաթոյանի աշխատանքների՝ «Շարժվող մասնիկներ» խորագրով անհատական ցուցահանդեսը, որը կազմակերպվել է Չեխիայում Հայաստանի դեսպանության և ցուցասրահի կողմից։

Տաղանդավոր նկարիչը ցուցադրության է ներկայացրել 29 գործ, որոնց մի մասը երբևէ չի ցուցադրվել։

Ձեռնարկի բացման խոսքերով հանդես եկան Չեխիայի Հանրապետությունում Հայաստանի Հանրապետության դեսպան Տիգրան Սեյրանյանը, ցուցահանդեսի հեղինակը և Յակուբսկա ցուցասրահի հիմնադիր-տնօրեն, հայտնի նկարիչ Ալեքսանդր Օնիշչենկոն։

Հայ դիվանագետն իր ելույթում նախ ներկայացրեց Նարեկ Վանին, ով Հայկական ԽՍՀ վաստակավոր նկարիչ և Հայկական ԽՍՀ արվեստի վաստակավոր գործիչ Հովհաննես Շարամբեյանի թոռն է։ Տ.Սեյրանյանը մատնանշեց երիտասարդ արվեստագետի նկարչության անկրկնելի ոճը և տեխնիկան, նշեց, որ նկարչի ստեղծած երևակայական Նարեկավան քաղաքն իր գույներով և բովանդակությամբ հիշեցնում է ոչ միայն Հայաստանի բնակավայրերը, այլև Չեխիայի մի շարք պատմական քաղաքներ, այդ թվում Պրահայի կենտրոնն ու Տելչը, այսպիսով կամուրջ ստեղծելով երկու երկրների երևակայական քաղաքների միջև։

Նարեկ Վան Աշուղաթոյանը պատմեց իր գործերի մասին, նշեց իր արվեստի ոգեշնչման աղբյուրները, նաև խորհուրդ տվեց հանդիսատեսին կուրորեն չընդունել իր բացատրություններն, այլ առաջնորդվել սեփական երևակայությամբ։ Ցուցասրահի հիմնադիր տնօրեն Ալեքսանդր Օնիշչենկոն էլ նշեց, որ հոց բազմության ներկայությունը վկայում է ցուցահանդեսի մեծ հաջողության մասին։

Ելույթներին հետևեց «Մասնիկների հեքիաթ» անիմացիոն ֆիլմի ցուցադրությունը և "Սարգսյան" լարային քառյակի կատարմամբ հնչեցին հայ և օտար երգահանների գործեր։

Նարեկ Վանի ցուցահանդեսի բացմանը ներկա էին չեխ խորհրդարանականներ և պաշտոնյաներ, արվեստագետներ, Չեխիայում հավատարմագրված օտարերկրյա դիվանագետներ, հայ համայնքի ներկայացուցիչներ։

Ցուցահանդեսը կգործի մինչև փետրվարի 21-ը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր