Հայ դիվանագետները հարգեցին Լիդիցեի ողբերգության զոհերի հիշատակը

11 հունիսի, 2016

2016թ. հունիսի 11-ին Չեխիայի Հանրապետության Լիդիցե բնակավայրի հուշահամալիրում տեղի ունեցավ նացիզմի զոհ գնացած զոհերի հիշատակին նվիրված արարողությունը: Հուշահամալիրը կառուցվել էր հավերժացնելու 1942թ. հունիսի 10-ին եւ դրանից հետո նացիստների կողմից ոչնչացված 340 բնակչի, այդ թվում 88 երեխաների հիշատակը: Գյուղի բնակչության սպանդից հետո գեստապոյականներն ամբողջովին հողի են հավասարեցրել բնակավայրը եւ փոխել տեղայնքի լանդշաֆտը:

Այս տարի պետական մակարդակով նշվում էր այդ ողբերգության 74-ամյա տարելիցը, որին մասնակցեց նաեւ Չեխիայի Հանրապետության նախագահ Միլոշ Զեմանը: Իր ելույթում Չեխիայի նախագահը մասնավորապես քննադատեց մերօրյա նացիստներին, որոնք գլուխ են բարձրացնում Չեխիայի եւ Սլովակիայի տարբեր վայրերում, օգտվելով դեմոկրատական ուժերի կողմից թույլ տված անգործունեությունից:

Օրհնության ու հիշատակի խոսքով հանդես եկավ Օլոմոուցի արքեպիսկոպոս Յան Գրաուբները, ելույթներ ունեցան հուշահամալիրի տնօրեն Միլոշ Չերվենցլը եւ Ազատության համար պայքարի մարտիկների միության նախագահ Յարոսլավ Վոդիչկան:

Այս տարի Լիդիցեն եւս մարդաշատ էր: Միջոցառման սկզբում եղբայրական գերեզմանին ծաղկեպսակներ զետեղեցին չեխ պաշտոնյաներն ու Չեխիայի Հանրապետությունում հավատարմագրված դիվանագիտական կորպուսի ներկայացուցիչները: Հայաստանի Հանրապետության դեսպանության կողմից արարողությանը մասնակցեցին գործերի ժամանակավոր հավատարմատար Նունե Զաստուխովան եւ հյուպատոս Աննա Ավետիսյանը:

Ելույթներով հանդես եկավ նաեւ Լիդիցեի մանկական երգչախումբը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր