Դեսպան Սեյրանյանի դասախոսությունը Պրահայի Անգլո-Ամերիկյան համալսարանում

16 մայիսի, 2016

Մայիսի 16-ին Չեխիայում ՀՀ դեսպան Տիգրան Սեյրանյանը հանդես եկավ դասախոսությամբ Պրահայի Անգլո-Ամերիկյան համալսարանում կազմակերպվող ավանդական «Դիվանագիտական ֆորում»-ին, որին ներկա էին դասախոսներ, ուսանողներ, վերլուծաբաններ, լրագրողներ և հայ համայնքի ներկայացուցիչներ։

Դեսպանը ներկաներին հանգամանալից ներկայացրեց ղարաբաղյան հիմնահարցի կարգավորման շուրջ վերջին զարգացումները, մասնավորապես` ապրիլի սկզբին Լեռնային Ղարաբաղի և Ադրբեջանի շփման գծի երկայնքով Բաքվի սանձազերծած լայնածավալ ռազմական գործողությունների հետևանքով ստեղծված իրավիճակը, ադրբեջանական զինուժի՝ միջազգային ահաբեկչական խմբավորումների ոճով իրականացված վայրագությունները հայ դիրքապահների և քաղաքացիական ազգաբնակչության նկատմամբ։ Այդ համատեքստում հայ դիվանագետը շեշտեց, որ Ադրբեջանի վարչակարգը հավատարիմ է մնում իր՝ մարդասպաններին հերոսացնելու քաղաքականությանը։

Իր խոսքում դեսպան Սեյրանյանը նշեց նաև, որ ապրիլյան «4-օրյա պատերազմը» մեծապես վնասել է բանակցային գործընթացին և որ ընթացիկ քննարկմանը զուգահեռ Վիեննայում ԵԱՀԿ Մինսկի խմբի համանախագահող երկրների արտաքին գերատեսչությունների ղեկավարների միջնորդությամբ մեկնարկում է Հայաստանի և Ադրբեջանի նախագահների հանդիպումը՝ ուղղված խաղաղ բանակցային գործընթացի վերսկսման համար համապատասխան պայմանների ձևավորմանը։

Դեսպան Սեյրանյանը նաև պատասխանեց ֆորումի մասնակիցների, այդ թվում՝ ադրբեջանցի, բազմաթիվ հարցերին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր