Հունվարի 29-30-ին ՀՀ դեսպան Աշոտ Հովակիմյանն աշխատանքային այց է կատարել Բելգրադ

30 հունվարի, 2026

Հունվարի 29-ին ՀՀ դեսպան Աշոտ Հովակիմյանը հանդիպում է ունեցել Բելգրադում կայանալիք «Էքսպո-2027» համաշխարհային ցուցահանդեսի տնօրեն Դանիլո Յերինիչի հետ՝ քննարկելու ցուցահանդեսին Հայաստանի մասնակցությանն առնչվող հարցեր։ Նույն օրը դեսպան Հովակիմյանը մասնակցել է ցուցահանդեսի խորհրդանիշերի անվանման հանդիսավոր արարողությանը, որի ընթացքում կարճ զրույց է ունեցել Սերբիայի փոխվարչապետ, ֆինանսների նախարար Սինիշա Մալիի հետ։

Հունվարի 29-ին դեսպան Աշոտ Հովակիմյանը հանդիպում է ունեցել Սերբիայի ԱԺ-ի Սերբիա-Հայաստան բարեկամության խմբի նախագահ Ալեքսանդար Չոտրիչի և խմբի անդամներ՝ Սերբիայի ԱԺ փոխնախագահ Յովան Յանյիչի, պատգամավորներ Յադրանկա Յովանովիչի, Օլիվերա Դենիչի և Իվան Կարիչի հետ։ Դեսպան Հովակիմյանը խորհրդարանականներին է ներկայացրել 2025թ. օգոստոսի 8-ին Վաշինգտոնում Հայաստանի և Ադրբեջանի միջև ձեռք բերված համաձայնությունները: Անդրադարձ է կատարվել ՀՀ կառավարության «Խաղաղության խաչմերուկ» նախաձեռնությանը և դրա կարևոր բաղադրիչ «ԹՐԻՓՓ ուղի» ծրագրին և ընդգծվել տարածաշրջանային փոխկապակցվածության համատեքստում դրանց կյանքի կոչման կարևորությունը:

Հունվարի 30-ին դեսպան Հովակիմյանը հանդիպում է ունեցել Սերբիայի նախագահի խորհրդական Տատյանա Յովիչի հետ, որի ընթացքում քննարկվել են Եվրոպական քաղաքական համայնքի՝ Երևանում կայանալիք գագաթաժողովին վերաբերող հարցեր։

Նույն օրը դեսպան Հովակիմյանին ընդունել է Սերբիայի փոխվարչապետ, էկոնոմիկայի նախարար Ադրիյանա Մեսարովիչը։ Հանդիպման ընթացքում անդրադարձ է կատարվել Հայաստանի և Սերբիայի միջև առևտրատնտեսական հարաբերություններին և վերջիններիս խթանմանն ուղղված քայլերին։

Աշոտ Հովակիմյանը հանդիպում է ունեցել Սերբիայի ԱԳՆ եվրոպական հարցերով փոխնախարար Միլոշ Տոդորովիչի և անվտանգային քաղաքականության հարցերով փոխնախարար Միլոշ Յանչիչի հետ, որոնց ներկայացրել է Հայաստանի և Ադրբեջանի միջև հաստատված խաղաղության պայմաններում տարածաշրջանային փոխկապակցվածության և ենթակառուցվածքների զարգացման ուղղությամբ իրականացվող ծրագրերը, ինչպես նաև ՀՀ-ԵՄ համագործակցության ներկա փուլը։

Նույն օրը երեկոյան դեսպան Հովակիմյանը Սերբիայի գենդերային հավասարության, կանանց նկատմամբ բռնության կանխարգելման, ինչպես նաև կանանց տնտեսական և քաղաքական հզորացման հարցերով նախարար Տատյանա Մացուրայի հետ մասնակցել է Սերբիայի ֆիլհարմոնիկ նվագախմբի ուղեկցությամբ աշխարհահռչակ դաշնակահարուհի Եվա Գևորգյանի՝ Բելգրադում կայացած համերգին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր