Հունվարի 19-20-ին ՀՀ դեսպան Աշոտ Հովակիմյանն աշխատանքային այց է կատարել Սլովենիայի Հանրապետություն

20 հունվարի, 2026

Հունվարի 19-ին ՀՀ դեսպան Աշոտ Հովակիմյանը տիկնոջ հետ ներկա գտնվեց Սլովենիայում հավատարմագրված դիվանագիտական ներկայացուցչությունների ղեկավարներին՝ Սլովենիայի Հանրապետության նախագահ Նատաշա Պիրց Մուսարի և վարչապետ Ռոբերտ Գոլոբի կողմից տրված Ամանորյա ընդունելությանը:

Հունվարի 20-ին ՀՀ դեսպանին ընդունեց Սլովենիայի Ազգային ժողովի նախագահ Ուրշկա Կլակոչար Զուպանչիչը: Երկուստեք բարձր գնահատական տրվեց Հայաստանի և Սլովենիայի միջև զարգացող հարաբերություններին, քննարկվեցին խորհրդարանների միջև համագործակցության հեռանկարները:

Սլովենիայի Արտաքին և եվրոպական գործերի նախարարությունում ՀՀ դեսպանին ընդունեցին Եվրոպական գործերի գլխավոր տնօրեն Իզտոկ Յարցը, Քաղաքական գործերի գլխավոր տնօրեն Մատեյա Նորչիչ Շտամցարը և Արևելյան Եվրոպայի, Հարավային Կովկասի և Կենտրոնական Ասիայի վարչության տնօրեն Անդրեա Պուրկարտ Մարտինեզը:

Քննարկվել են երկկողմ օրակարգի բազմաթիվ հարցեր; ՀՀ դեսպանը զրուցակիցներին է ներկայացրել նաև Հարավային Կովկասում զարգացումները, տարածաշրջանում հաստատված խաղաղության պայմաններում Հայաստանի արտաքին քաղաքականության առաջնահերթությունները, Հայաստան-ԵՄ գործընկերության ռազմավարական օրակարգի հարցեր, ինչպես նաև 2026թ. Հայաստանում կայանալիք Եվրոպական քաղաքական համայնքի 8-րդ գագաթաժողովի և Կենսաբազմազանության մասին կոնվենցիայի կողմերի 17-րդ համաժողովի (COP17) նախապատրաստական աշխատանքները:

Այցի ընթացքում Ա.Հովակիմյանը ներկա գտնվեց Սլովենիայի Առևտրի և արդյունաբերության պալատի ընդունելությանը, կազմակերպված Սլովենիայում հավատարամագրված դեսպանների համար, ինչպես նաև ՄԱԿ Մարդու իրավունքների խորհրդում 2026-2028թթ. Սլովենիայի անդամակցության առաջնահերթությունների ներկայացմանը, որը վարում էր ԱԵԳՆ պետական քարտուղար Մելիտա Գաբրիչը:

ՀՀ դեսպանն այցելեց Սլովենիայի Ազգային և համալսարանական գրադարան, որտեղ գրադարանի գլխավոր տնօրեն Յանա Կոլարի հետ քննարկեց Հայաստանի Ազգային գրադարանի և Մատենադարանի հետ համագործակցության հեռանկարները, գրադարանին նվիրեց Հայաստանի վերաբերյալ մի շարք հրատարակություններ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր