«Վրնյաչկա Բանյայում հայերի 100 տարիները» ցուցահանդեսի հանդիսավոր բացումը Սերբիայի Վրնյաչկա Բանյա քաղաքում

19 ապրիլի, 2022

Ապրիլի 19-ին Սերբիայի զբոսաշրջության մայրաքաղաք Վրնյաչկա Բանյայում ՀՀ դեսպան Աշոտ Հովակիմյանի և քաղաքապետ Բոբան Ջուրովիչի բարձր հովանավորությամբ, տեղի ունեցավ «Վրնյաչկա Բանյայում հայերի 100 տարիները» ցուցահանդեսի հանդիսավոր բացումը, որը կազմակերպել էին Վրնյաչկա Բանյայի հայերի նորաստեղծ միությունը և քաղաքի Մշակույթի թանգարանը:

1922թ. գարնանը, Հայոց ցեղասպանության արհավիրքներով անցած և Միջերկրականի ծովափնյա Դորթ Յոլ համայնքում պատսպարված հայ մի քանի ընտանիքներ (ընդամենը՝ 40 հոգի), ստիպված էին կրկին գաղթել հույն փախստականների հետ մեկտեղ, և հայտնվելով Սալոնիկում, դիմեցին Հարավսլավիայի թագավոր Ալեքսանդար Առաջինին՝ Հարավսլավիա (Սերբիա) վերաբնակեցման խնդրանքով: Արդյունքում՝ նրանց և թագավորական գրասենյակի միջև 10 տարով կնքվեց վերաբնակեցման և հողատարածքների գնման մասին պայմանագիր: Սա Հայոց ցեղասպանությունից հետո Սերբիա հայ կազմակերպված գաղթականության բացառիկ դեպք էր, որի շարունակությունն եղավ քաղաքում հաջողակ, աշխույժ և իրար հետ սերտորեն կապված հայկական համայնքի գոյությունը 100 տարվա ընթացքում:

Արարողության սկզբին ՀՀ դեսպան Աշոտ Հովակիմյանը, Վրնյաչկա Բանյայի քաղաքապետ Բոբան Ջուրովիչը, Վրնյաչկա Բանյայի հայերի միության նախագահ Չեդոմիր Արտինովիչ-Արթինյանը, քաղաքի լայն հասարակության, Սերբիայի տարբեր քաղաքներից և նույնիսկ արտեկրից ժամանած վրնյաչկահայերի ժառանգորդների հոծ բազմության ներկայությամբ, ծաղկեպսակներ խոնարհեցին քաղաքի կենտրոնական այգում զետեղված Հարավսլավիայի թագավոր Ալեքսանդար Կարաջորջևիչի հուշարձանին:

Այնուհետև քաղաքի Մշակույթի թանգարանում, որը նախկինում հայտնի մեծահարուստ Ռելյա Բելիմարկովիչի առանձնատունն էր և որի շուրջ էին վերաբնակեցվել առաջին հայ գաղթականները, տեղի ունեցավ ցուցահանդեսի հանդիսավոր բացում, որի ընթացքում ողջույնի խոսք ասացին դեսպան Հովակիմյանը, քաղաքապետ Ջուրովիչը, թանգարանի տնօրենը: «Կյանքը լուսանկարների միջոցով» ցուցահանդեսի հեղինակ Սլավիցա Դավիդովիչը (Տեր-Պողոսյան) ներկայացրեց ցեղասպանությունից փրկված և իրենց երկրորդ տունը Սերբիայում գտած մի շարք հայ ընտանիքների (Տեր-Պողոսյաններ, Արթինյաններ, Բելանյաններ, Սեդրակյաններ, Յեղենյաններ) կյանքը և գործունեությունը վերջին հարյուր տարիների ընթացքում: Հատկանշական էր, որ ցուցահանդեսին ներկայացված էին նաև Բելանյան և Տեր-Պողոսյան ընտանիքների չորրորդ սերնդի ներկայացուցիչներ՝ տաղանդավոր քանդակագործ Յովանա Պետկովիչ Բելանյանը և նկարիչ Ռելյա Տեր Պողոսյանը:

Միջոցառումը մեծ հետաքրքրություն առաջացրեց Սերբիայում և լայնորեն լուսաբանվեց կենտրոնական և տարածաշրջանային մամուլում և հեռուստատեսությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր