Հայոց ցեղասպանության 110-րդ տարելիցի կապակցությամբ միջոցառում Պրահայում

24 ապրիլի, 2025

Ապրիլի 24-ին Հայոց ցեղասպանության 110-րդ տարելիցի կապակցությամբ Պրահայի հայկական խաչքարի մոտ կայացավ ծաղկեպսակների զետեղման և ոգեկոչման արարողություն՝ ի հիշատակ Հայոց Ցեղասպանության զոհերի:

Միջոցառման մեկնարկին, Պրահայի արքեպիսկոպոս և Չեխիայի կաթոլիկ եկեղեցու առաջնորդ Յան Գրաուբները աղոթք բարձրացրեց Հայոց Ցեղասպանության մեկ ու կես միլիոն զոհերի հիշատակի համար, կոչ անելով խաղաղության, արդարության և հիշողության։

Արարողությանը մասնակցեցին Չեխիայում հավատարմագրված դիվանագիտական կորպուսի ներկայացուցիչներ, Չեխիայի խորհրդարանի անդամներ, հասարակական-քաղաքական գործիչներ, լրագրողներ, ինչպես նաև չեխահայ համայնքի բազմաթիվ անդամներ։

Պրահայի Սուրբ Հոգի եկեղեցում Չեխիայի, Սլովակիայի և Հունգարիայի Հայ առաքելական եկեղեցու հոգևոր հովիվ Բարսեղ վարդապետ Փիլավչյանի հանդիսապետությամբ տեղի ունեցավ Հայոց ցեղասպանության Սրբոց Նահատակաց հիշատակման արարողություն:

Միջոցառմանը ներկաներին օրվա խորհրդին նվիրված ուղերձով դիմեց Չեխիայում ՀՀ դեսպան Աշոտ Հովակիմյանը: Դեսպանը նշեց ցեղասպանությունների վաղ նախազգուշացման, կանխարգելման կարևորությունը, ընդգծելով, որ Հայաստանն, իր անցյալը հարգելով, շարունակում է ապագայի կառուցումը, որն ընթանում է հանդուրժողականության, խաղաղության, մարդու իրավունքների պաշտպանության և բռնությունների կանխարգելման ուղիով։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր