Սեպտեմբերի 15-ին ՀՀ դեսպան Աշոտ Հովակիմյանը մասնակցեց Կրալուպի Նադ Վլտավոու քաղաքի կենտրոնական պուրակում Հայոց ցեղասպանության զոհերի հիշատակին նվիրված խաչքարի բացման արարողությանը

15 սեպտեմբերի, 2021

Սեպտեմբերի 15-ին ՀՀ դեսպան Աշոտ Հովակիմյանը մասնակցեց Կրալուպի Նադ Վլտավոու քաղաքի կենտրոնական պուրակում Հայոց ցեղասպանության զոհերի հիշատակին նվիրված խաչքարի բացման արարողությանը, որը հյուրընկալեցին քաղաքապետ Մարեկ Չեխմանն ու նրա տեղակալ Լիբոր Լեշակը և նախաձեռնության հեղինակ, քաղաքային խորհրդի անդամ, մեր հայրենակից Թելման Ներսիսյանը։ Արարողությանը մասնակցություն ունեցավ և Հայոց ցեղասպանության զոհերի հիշատակին խոսքով հանդես եկավ Չեխիայի կաթոլիկ եկեղեցու առաջնորդ, Պրահայի արքեպիսկոպոս կարդինալ Դոմինիկ Դուկան։ Ելույթներ ունեցան նաև Հայոց ցեղասպանության մասին գրքի չեխ հեղինակ Մարեկ Յանդակը և Պրահայի Ռժեպորիյի համայնքապետ Պավել Նովոտնին, ում ղեկավարության ներքո Արցախյան պատերազմի օրերին համայնքը հանդես եկավ հայ ժողովրդի սատարմամբ և Արցախի ճանաչմամբ։

Ողջույնի խոսքով ներկաներին դիմելով, դեսպան Ա.Հովակիմյանը շնորհակալություն հայտնեց Թ.Ներսիսյանին՝ նախաձեռնության և քաղաքային իշխանություններին՝ նախաձեռնությանն իրենց աջակցության, ինչպես նաև Չեխիայի խորհրդարանին՝ Հայոց ցեղասպանության ճանաչման համար, անդրադարձավ Հայոց ցեղասպանության ճանաչման գործընթացի կարևորությանը՝ ժխտողականության դեմ պայքարի և ցեղասպանությունների կանխարգելման գործում։ Դեսպանը խոսեց նախորդ տարի Արցախի դեմ ադրբեջանա-թուրքական տանդեմի ագրեսիայի ցեղասպան մտադրությունների, հայերի բնաջնջման և հայ պատմամշակութային ժառանգության ոչնչացման փորձերի դեմ հայ ժողովրդի կողմից տարվող գոյութենական պայքարի, ապրելու և ստեղծագործելու անկոտրում ոգու և այդ համատեքստում նշյալ խաչքարի տեղադրման խորհրդանշական դերակատարության մասին։ Դեսպանը նաև կարևորեց ձեռնարկի նշանակությունը Հայաստանի անկախության 30-ամյա հոբելյանի շրջանակներում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր