ՀՀ դեսպան Աշոտ Հովակիմյանը մասնակցեց Սլովենիայի Հանրապետության պետականության 30-ամյակին և Եվրոպական Միության խորհրդում սլովենական նախագահության ստանձնման նվիրված պետական հանդիսավոր տոնակատարությանը

25 հունիսի, 2021

Հունիսի 25-ին Սլովենիայի Հանրապետության նախագահի, Ազգային ժողովի և կառավարության հրավերով, ՀՀ դեսպան Աշոտ Հովակիմյանը մասնակցեց Սլովենիայի Հանրապետության պետականության 30-ամյակին և Եվրոպական Միության խորհրդում սլովենական նախագահության ստանձնման նվիրված պետական հանդիսավոր տոնակատարությանը։

Սլովենիա այցի ընթացքում ՀՀ դեսպանին ընդունեց Լյուբլյանայի քաղաքապետ Զորան Յանկովիչը: Հանդիպման ընթացքում քննարկվեցին Երևանի և Լյուբլյանայի միջև համագործակցության հնարավորությունները, ընդգծվեց մշակութային միջոցառումների անցկացման և փոխայցելությունների իրականացման կարևորությունը։

Սլովենիայի ԱԳՆ պետքարտուղար Ստանիսլավ Ռաշչանի հետ հանդիպման ընթացքում քննարկվեց երկկողմ և բազմակողմ համագործակցության օրակարգային հարցերի լայն շրջանակ: Դեսպանը հանգամանալից ներկայացրեց թուրք-ադրբեջանական տանդեմի կողմից Արցախի նկատմամբ սանձազերծված պատերազմից հետո տիրող իրավիճակը և երկրի առջև ծառացած հումանիտար խնդիրները, հատկապես, Ադրբեջանի կողմից հայ ռազմագերիների վերադարձի պահանջը։ Պետքարտուղարը մանրամասն անդրադարձ կատարեց ԵՄ խորհրդում Սլովենիայի նախագահության առաջնայնություններին։

Դեսպանն այցելեց նաև Սլովենիայի «Մարդու անվտանգության խթանում» (ITF) կազմակերպության գրասենյակ, որի տնօրեն, դեսպան Տոմաշ Լովրենչիչի հետ քննարկվեցին Հայաստանի հետ համագործակցության և օժանդակության ծրագրերը։

Այցի ընթացքում կայացան ՀՀ դեսպանի հանդիպումները Սլովենիա-Հայաստան պատգամավորական բարեկամության խմբի նախագահ Անդրեյ Չեռնիգոյի և Սլովենիայում բնակվող փոքրաթիվ հայ համայնքի ներկայացուցիչների հետ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր