ՀՀ դեսպան Աշոտ Հովակիմյանն աշխատանքային այց կատարեց Չեխիայի Լիբերեցի երկրամաս

15 նոյեմբերի, 2024

Նոյեմբերի 15-ին ՀՀ դեսպան Աշոտ Հովակիմյանն աշխատանքային այց կատարեց Չեխիայի Լիբերեցի երկրամաս, որտեղ դեսպանին ընդունեց երկրամասի ղեկավար (հեյտման) Մարտին Պուտան: Ներկայացնելով երկրամասի նկարագիրը, նա շեշտեց միջտարածաշրջանային համագործակցության խթանման պատրաստակամությունը, հատկապես, կրթության, հետազոտության և նորարարության ոլորտներում: Դեսպանը ներկայացրեց հայ-չեխական երկկողմ օրակարգի զարգացումներն ու Հարավային Կովկասում կայուն խաղաղության հասնելու հարցում ՀՀ տեսլականը, մտքեր են փոխանակվել տարածաշրջանային անվտանգությանն ու կայունությանն առնչվող հարցերի շուրջ։

Նույն օրը դեսպանն այցելեց Լիբերեցի տեխնիկական համալսարան և պրոռեկտոր Պետր Լենֆելդի ուղեկցությամբ շրջայց կատարեց համալսարանում, ծանոթանալով համալսարանի հետազոտական և նորարարական հնարավորություններին: Համալսարանի ռեկտոր Միրոսլավ Բժեզինայի հետ հանդիպմանը քննարկվել են հայկական բուհերի հետ համագործակցության հնարավոր ուղիները և ուսանողների շարժունակությունը բարձրացնելու հնարավորությունները: Դեսպանը զրուցակցին ներկայացրեց ԹՈՒՄՕ ստեղծարար կենտրոնի հայեցակարգն ու Չեխիայում մասնաճյուղ հիմնելու գաղափարը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր